Bayang Magiliw

by Yas Jayson Tuesday, June 16, 2009 15 palagay

Isang siglong malaya.
Malaya saan?

Malaya na ba ang mga ilog natin sa basura?
Malaya na ba ang mga lupa para sa mga magsasaka?
Hindi pa siguro.

Sino ang malaya?
Malaya ang mga politikong artista at mga artistang gustong maging politiko.
Malaya din ang mga buwayang nasa kalsada, nag-aabang ng instant panlaman sa tyan. Mga negosyanteng mapanlamang, mga holdaper sa daan.
Sila ang maituturing mong ganap na malaya.

Nakatira ka sa bansang maraming tele-novela, mga batang lansangan at mga lumilipad na langaw. Wag kang mag-maasim. Realidad yan. Dito ka nakatira. Kung saan ang balita ay tungkol lagi sa mga chismis, sex videos, at away personal ng mga politiko. Kung hindi man ganon, ang balita ay tungkol sa mga nasalanta ng baha, bagyo at landslides. Kung saan ang mga highways ay nagiging fishponds, ang mga overpass ay palengke, at ang mga sidewalks ay may nakaparadang sasakyan.

Ito ang bansang umaasa kay Darna, Kapitan Boom, Krystala, Lastik Man at Zorro. Kung saan ang binoboto ng mga tao ay yung sikat, yung maganda, gwapo, mabango at mayaman. Kung saan ang mga matatalino ay nagpuputa sa telepono, kumakausap ng mga banyagang hilaw. Kung saan ang mga skwelahan ay kulang sa upuan, libro, at mga matitinong guro. Kung saan ang presyo ng pamasahe ay paiba-iba, at mga pangunahing pangangailangan ay kailangan pang iaangkat. Kung saan ang pangangampanya ay sinisimulan sa pamamagitan ng commercials, at ang mga pondo ng ahensya ay nawawala, tinatago, binubulsa.

Naniniwala kang malaya ka?

Isaangdaan at labing isang taon ka na daw malaya. Malayang halayin ng mga bisitang sundalo, malayang babuyin ng mga kung sino ang hindi mo kayang linanging likas na yaman. Isaangdaan at labing isang taon ay napakatagal na panahon. At tayo, nakuntento sa mga nakasulat na pahayag.

Sapat na ba ang sinulat na deklarasyon na aalis na dito ang mga nang-aping dayuhan? Sapat na ba na ituro sa mga paaralan ang nangyari higit isang daang taong na ang nakakaraan?

Hanggang kelan ang mga protesta ng mga mangagawa sa daan?
Hanggang kelan dapat maki-elam ang mga obispo at mga pari para magsimula tayong kumilos?
Hanggang kelan maglalakad ang mga magsasaka ng Sumilao?
Hanggang kelan magtitiis sa masikip na silid-aralan?
Hanggang kelan may mamatay na Pilipino dahil sa gutom?
Hanggang kelan tayo mabubuhay sa utang?
Hanggang kelan may magpuputa, magbebenta ng sariling lamang-loob at mamamasura?
at hanggang kelan tayo magtitiis, makukuntento at maaaliw sa mga kakarampot na bagay na kaya nating paramihin?

Kailangan pa ba natin ng marami pang EDSA revolution?
Ilang Rizal, Macliing-dulag at Ninoy pa ang kailangang mapaslang?
Kailangan pa bang may mamatay ulit para malaman natin ang halaga ng pagiging PIlipino?

Di pa tayo malaya. Hindi pa.

Pero dahil may mga kabataang mangahas at mga matatandang naniniwalang posible pa rin ang pagbabago, may pag-asa.

Ngunit sa ngayon, ang kalayaan ay isa pa ding konsepto.

Isang malaking teorya.

Teoryang sabay sa hangin. walang giting at porma.

(*isinulat ng biglaan, kulang sa porma, ayos at ideya. paumanhin. di ko pa magawang tapusin. buburahin din pagkatapos ng isang araw. :D)

**napagpasyahan kong hindi na burahin dahil na din sa pakiusap ng ilan. bow.